സമസ്ത:
സമഗ്രതയുടെ
സഞ്ചാരം

ജ്ഞാന കേന്ദ്രീകൃത സമൂഹത്തിലാണ് മതം തനിമയോടെ പൂർണാർഥത്തിൽ ജ്വലിച്ച് നിൽക്കുക. തിരുനബിയുടെ(സ്വ) കാലം മുതൽ അതീവ ജാഗ്രതയോടെ പണ്ഡിതലോകം ഈ ആശയത്തെ കാത്തുസൂക്ഷിച്ചതിന്റെ ഫലമാണ് കാലങ്ങൾക്കിപ്പുറം പല ദേശങ്ങളിൽ ഇസ്‌ലാം നിറഞ്ഞു നിൽക്കുന്നത്.

മനുഷ്യ ജീവിതത്തിൽ അഭിമുഖീകരിക്കാൻ സാധ്യതയുള്ള സർവ്വ മേഖലകളിലും മധ്യമനിലപാടിന്റെ സൗന്ദര്യത്താൽ തിരുനബി(സ്വ) തീർത്ത വശ്യതയാണ് അന്ത്യദിനം വരെയുള്ള വിശ്വാസികളുടെ ആത്മധൈര്യത്തിന്റെ കാതൽ. ഈ മനോഹരിതയെ വിരൂപമാക്കാൻ മതത്തിന് അകത്തും പുറത്തും ഒളിഞ്ഞും തെളിഞ്ഞും ശ്രമങ്ങൾ ഉണ്ടായപ്പോഴെല്ലാം ഉലമ കെട്ടിയ ഉരുക്കുകോട്ടകൾ കാവൽ തീർത്തു.

സ്വാഹാബയുടെ കാലത്ത് മതത്തിന്റെ മധുരം നുകർന്ന മലയാളി മണ്ണിനും തലമുറകളുടെ ഉലമ പാരമ്പര്യം തീർത്ത കരുതലിന്റെ കഥ പറയാനുണ്ട്. പണ്ഡിതരുടെ ജീവിതം ഇസ്ലാമായി അനുഭവിച്ച ഓരോ ദേശങ്ങളിലും ഐക്യവും സഹോദര്യവും ആത്മീയതയും നിറഞ്ഞുനിന്നു. അനിവാര്യ ഘട്ടത്തിൽ ഈ പണ്ഡിത ഇടപെടലുകൾക്ക് സംഘടിത രൂപം വന്നു. സമസ്തയെന്ന മഹത്തായ സംവിധാനമായി വിശുദ്ധ പ്രകാശത്തെ കേരളം അനുഭവിച്ചു.

അറിവിന്റെ ആത്മാവിനെ ജീവവായുവായി കണ്ട് സന്ദർഭാനുസരണം തിരു ജീവിതത്തിന്റെ കാലാനുസൃത ആവിഷ്കാരങ്ങൾ അവർ പകർന്നു. ഇസ്‌ലാമിന്റെ സമഗ്രമായ ആശയങ്ങളുടെ ഉൾക്കരുത്തിൽ ഉമ്മതിനെ ചിറകിലേറ്റി അവർ കാലങ്ങളിലൂടെ സഞ്ചരിക്കുകയാണ്. സെന്റിനറി ഒരു തുടർച്ചയുടെ അടയാളപ്പെടുത്തലാണ്. സമസ്തയുടെ സമഗ്ര സഞ്ചാരത്തെ ചർച്ച ചെയ്യുകയാണ് സ്റ്റുഡന്റസ് ഇസ്‌ലാമിക് സെൻസോറിയം.